جبل موسى

جوزيف خليل

يا سايح لما تِجي تتزورنا شي نهار تتكون زيارتك حلوة و بالبال محفورة زور البيوت يلّي عليها الزمن جار وتركها لحالها وصارت من سنين مهجورة هونيك في قصّة خبروا عنها الكتار عن الرجال اللي بنيوا البيوت وركبوا الجسورة و كان في صبيّة تحصد القمح و تجمعو غمار و عشيّة تغزل الحرير و قديش تكون مسرورة ورعيان حتّى يشربوا يعبّوا المَي بالفخار من بير صافي نقي مش مي معكورة ما كان في عندن كهربا ولا يسمعوا أخبار عاشوا حياتن عهوى الإيّام مستورة وهلأ فكّر عمهلك و لما تقرّر المشوار زور و صوّر الموقع وتبقى بَروِز الصورة

سركيس عطاالله

نحن كنا صغار كانو يخبرونا اهلنا والجيران والعالم يخبرونا انه في بجبل موسى فوق في ناس قاعده في عندهم بيوت وقاعدين فوق ومبسوطين يزرعوا زريعة وعندهم طرش عندهم بقر ومعزة. ويزرعوا ويشيلوا قزّ وقاعدين فوق ومبسوطين و محلاهم عايشين عرواق ما عبالهم بال ما فرقة معن هذا تناقر مع هاذ, هاذ خبط هاذ بعاد عن نقمة العالم وعن مشاكلها قاعدين فوق ومبسوطين

سمعان خويري

أربع روس بقر وخمسين راس معزة ودجاج كنّا نزربن بهيدي الكابيلّا فوق وبهيدا الرواق بقولولو عند القناطر بالصيف ننام هونيك أحلى نومة بالصيفية بالصيفية أيه أحلى نومة

الدكتورة ياسمين معكرون بو عسّاف

تم تغطية الجدران الداخلية لهذه البيوت بطبقة من الجص الحجري، وهو أمرٌ طبيعيٌّ في نهاية القرن الثامن عشر وبداية القرن التاسع عشر. إنه جص مصنوع من الحجر الجيري، مادة مستخرجة محليًا، في الموقع نفسه، مما يسمح بإضاءة المكان، وتطهيره، وجعله متوافقًا مع الحياة الثابتة.

سمعان خويري

هيدا مدخل البيت هو بعدو معروف! كان في باب هون؟ لا مفيش باب مكان في باب من زمان؟ هون كان في تنور تنور هالعلي نخبز عليه هيدا باب البيت هون هيدي الأوضة هاي كانوا يقدسو فيا. كانت كابيلا أي بس ما خارجة عن البيت هاي الأوضة هون كنا نحط نحل فيها كان عنا 100 قفير ما نشتري عسل تبيعو عسل؟ يجو القمامزي (أهالي قهمز) ياكلوا عسل عنا ما نطعمش سكر أبدًا يجو ياكلوا عسل بشهده ما داعانوش هيدا البيت يطبّق ولا أحلى من هيك بكل قهمز ما حدش عندن منّو أحلى عيشة هون فلينا عا قهمز غصبا عنّا

الدكتورة ياسمين معكرون بو عسّاف

سَتْرٌ مستديرة القوس بسعة كبيرة ضمن المجمع الحجري ربما كانت تضمن استقلالية المياه لهذه الجماعة المستقرة في هذه القرية هذه القرية، التي ربما كانت تستوعب حوالى خمسة عشر إلى عشرين شخصًا، احتاجت إلى الاعتماد على نفسها من خلال الزراعة، ولكن أيضًا عن طريق ضمان كمية مياه دنيا تكفي خلال الصيف والربيع وربما الخريف. أن تكون قادرًا على تصريف مياه الأمطار والمياه الجارية هو شيء مهم، ولهذا نرى جدرانًا منخفضة من حولنا سمحت بتحديد المناطق الزراعية، فضلاً عن مناطق جمع مياه الأمطار لتوفير مادة حيوية أساسية، وهي المياه، المصدر الرئيسي للحياة.

سمعان خويري

هيدا البيت(البيت الأوّل) لي كنّا في فوق عملنا عرس في عرس المرحوم خيي (ديب) عملنا هونيك راحت الضيعة جرد حضرت العرس؟ حضرت العرس و مبسوطة و تنام ويشربو عرق ولحم و كل شي أربع روس بقر

خليل أبي خليل

أنا من أمز (قهمز) إسمي خليل جريس أبي خليل بسنة الـ 1957 كان في عرس بالجبل أنا كان عمرني 17 سنة العريس إسمو ديب مسيح الخويري و العروس سليمة يوسف زغيب من حراجل بيعزمنا وبيعزم الضيعة و مشينا سفر ساعتين تـوصلنا عالجبل بالبيت الفوقاني كلو مشي، لا في طرقات ولا في عربيات ولا في شي تلاقينا بوفد من المشاتي جايي، من يحشوش، و من حراجل جبل موسى صار في عالم كثير و قعدنا ومشي شرب العرق والغناني و الرقص و الدبكة و يزمروا بالقصب حلقة الدبكة تبقى شي عشرين ثلاثين واحد يقيموا جران و يحطو كباش، يتحدوا بعضن بالكباش وفي محدلة تقبينة اللي يقبنا ويحطا بالتوتة التوتة عالية شي متر هيك يعملوها عسوية اللي ينهض المحدلة و يحطها بالتوتة إذا بتقيم الجرن بتاخد العروس ما بتقيم الجرن ما في عروس ضلينا سهرانين كل الليل حتى طلع الضو في شاعر كان بالمشاتي من المشاتي إسمو إميل سيف عمل ردة تحدّي للشعّار في شعّار كان قالهم: جايي عجبل موسى معنّى سمعو و عهد الخليل و عهد موسى رجعو تنشوف منكن مين كبش المحرقة ومين هلّي جايب اللوحة معو هاو فايقلن بس

ديب خويري

بجبل موسى, أعدنا صربة (فترة طويلة) فيه يمكن حوالي 30 سنة قاعدين هونيك, شو بعرفني إلنا 50 سنة جايين من هونيك تجوزت بالجبل إي و كنت عازم الضيعة كلها في وحوش بعوّو وكل شي

سركيس عطاالله

بالشتويه لما تقسا الدني كثير ينزلوا على الساحل يشتوا بـ غزير وبـ الجديدة مرّة إخذو البسَيْن معهم من فوق عـ غزير تيشتّوا بـ غزير معهم بالكيس راح البسين ثاني يوم ضَيعو البسين تاري البسَين بشم بالريحة رجع مطرح ما راح رجع حطوا بالكيس على ظهر الحمار واخذوا صار يشم ريحة الدرب رجع، ثاني يوم رجع لفوق ضيعوه. من بعد جمعة اجوا عالبيت تياخذوا شي غرض لقيوا البسَين رجع عالبيت فوق بالجبل الزلمه اللي قاعد بالجبل كان اسمو مسيح يقولولو مسيح الجبل عندو اولادو شباب يجوا يسهروا بـ يحشوش هون بالوادي عند بيت بدران يجمعوا بعضهم ويلعبوا ذبح العنز اثنين ثلاثة عالحيط يترسوا بالحيط واحد ورا الثاني واحد ورا الثاني و اثنين ثلاثة يفزّوا عليهم آخر واحد بدو يهدا إذا ما هديش عليهم بكون خسر اللي هدي بكون ربح آخر واحد هوّي وعم بيفزّ عليهم قلو حيلك آه سمعان بدران حيلك جيت بضهرك ونط و و ربح جا بضهروا وربح خلصت السهريّة بدهم يسربوا هنّي ومسربين راحوا على الجبل. نام غفي من بعد ما غفي بصر بنومو من يفزّ عـ سمعان بدران قام هوي ومروبس هوي وغافي قام ونطّ عن السطيحة قلو حيلك آه سمعان بدران حيلك جيت بضهرك راح تحت البيت يا حرام نط طلع من باب السطيحة عالسطيحة ونط لتحت البيت فكر حالو عم بينط عـ سمعان بدران وكسّر حالو وطلعت الصرخة بس نط وعي، طلعت الصرخة قام بيّو لقيو تحت البيت وسمعو عم يقول حيلك آه سمعان بدران حيلك دينك ودين سمعان بدران خربتلّي بيتي. (ويني القهوة يا مرا!) كانوا يسهروا عند بعضهم بعض فوق قديمًا، أش بدّن يلعبوا؟ مافيش لعب شي و لا في تلفيزيونات و لافي تيليفونات و لا في شي يتسلوا يلعبوا بالورق، يلعبوا بـ دبح العنز، يلعبوا عـ الركوب كانو ينفخوا الجراب تبع البذار ينفخوه مزبوط و يربطولو بوزو ويشدّوه ويحطوه بالأرض بالسهلة ويطلعوا عالركوب وينطوا واللي يجي واقف عالركوب يكون ربح بس ما حدش يربح ما هيدا الجراب مثل الفوتبول ينطّ عليه يزتو شي يمين شي شمال و هي كانت سهريتن